ऋतुगंध शिशिर वर्ष १२ अंक ६
कारणा शिवाय
ठरवून कधीतरी,
मित्रांना बोलावून
आपल्या घरी,
पंगतीचा उडवावा
असा थाट,
डाएटची लावावी
पुरती वाट !
पंगतीला असावे
चांदीचे ताट,
जमला तर ठेवावा
चंदनी पाट,
ताटात असाव्या
वाट्या आठ,
भोवती असावा
रांगोळीचा थाट !
वरण भातावर
धरावी तुपाची धार,
मसाले भातावर
पेरावा ओला नारळ,
पापडा शेजारी
वाढावी कोशिंबीर,
लिंबा सवे असावा
लोणच्याचा खार !
फुगल्या पुरीवर
वाढावे श्रीखंड,
वाटीत शेजारी
बासुंदी थंड,
बाजुला ठेवावी
जिलेबी केशरी,
दुधी हलव्या शेजारी
गुलाबजाम भारी !
एका वाटीत
ठेवावी रस्सा भाजी,
सोबत त्याच्या
गरमा गरम भजी,
वालाची उसळ
आणेल बहार,
चटणी चाखून
काढावा चित्कार !
मग तृप्त मनाने
देवून ढेकर,
हात फिरवून
भरल्या तुंदीलावर,
खावा वरती
गोविंद विडा,
जो आणेल
मग बहार !
*झुरळ*
उडते पाहताच याला
बायकांची बघा गाळण,
असेल थोडे जरी मोठे
बसते पाचावर धारण !
लांब टोकदार मिशा
पाहून घाबरती सबला,
काय करणार ते बिचारे
घाबरून पळते जीवाला !
असेल चुकून जर ते
पंखवाले व उडणारे,
मारण्या त्यास मग
उडवती औषधी फवारे !
पण नेमका अशा वेळी
झाडू मिळत नाही घरात,
मग निघे त्याच्या मागून
घरातल्यांची पण वरात !
जन्मा पासून वसुंधरेच्या
आहे म्हणे त्याचे अस्तित्व,
चिनी 'सुपातूनच' जाणोत
त्याच्या अंगीचे खरे सत्व !
- प्रमोद वर्तक
पहिली बहारदार कविता वाचूनच तोंडाला सुटले पाणी
उत्तर द्याहटवाकविराज होऊन जाऊ द्या , घ्या सत्वर पाटपाणी I
यकष्चित् झुरळच देते आम्हाला नैतिक बळ
ऊभ्या ठाकण्या महाकाय अबले जवळ I